അര്ജന്റീന ഫുട്ബോള് ടീം കേരളത്തെ ചതിച്ചുവെന്ന കായികമന്ത്രി വി. അബ്ദുറഹിമാന്റെ പ്രസ്താവനയ്ക്കെതിരെ രൂക്ഷവിമര്ശനവുമായി മുന് കായികതാരവും പരിശീലകനുമായ പ്രമോദ് കുന്നുംപുറത്ത്. ‘മെസ്സിക്കെതിരെ അങ്ങ് കേസ് നല്കുന്നത് താനൂര് പോലീസ് സ്റ്റേഷനിലാണോ അതോ അങ്ങയുടെ സ്വന്തം മണ്ഡലമായ തിരൂരിലാണോ?’ എന്ന് പരിഹാസത്തോടെ പ്രമോദ് കുന്നുംപുറത്ത് ഫെയ്സ്ബുക്കില് കുറിച്ചു.
ഫേസ്ബുക്ക് കുറിപ്പിന്റെ പൂര്ണ്ണരൂപം
അര്ജന്റീന ടീം കേരളത്തെ ചതിച്ചു എന്നും അവര്ക്കെതിരെ നിയമനടപടി സ്വീകരിക്കും എന്നുമുള്ള അങ്ങയുടെ പുതിയ തമാശ’ കേട്ട് ചിരിക്കണോ കരയണോ എന്നറിയാത്ത അവസ്ഥയിലാണ് കേരളത്തിലെ ഫുട്ബോള് പ്രേമികള്. മെസ്സിക്കെതിരെ അങ്ങ് കേസ് നല്കുന്നത് താനൂര് പോലീസ് സ്റ്റേഷനിലാണോ അതോ അങ്ങയുടെ സ്വന്തം മണ്ഡലമായ തിരൂരിലാണോ?
അടുത്ത ലോകകപ്പ് വരാനിരിക്കുന്ന ഈ സമയത്ത് അങ്ങയുടെ ഈ ‘ഭീകര’ പരാതി കേട്ട് മെസ്സിയും സംഘവും മാനസികമായി തകര്ന്നുപോയാല് മെസ്സി ആരാധകര് അങ്ങയെ ശപിക്കില്ലേ ?
‘സ്പോണ്സര്മാര്ക്ക് മാത്രമേ നഷ്ടമുള്ളൂ’ എന്ന് അങ്ങ് ലാഘവത്തോടെ പറയുമ്പോള് ഞങ്ങള് ചോദിക്കട്ടെ; അര്ജന്റീന ടീമിനെ കൊണ്ടുവരാന് നടത്തിയ യാത്രയ്ക്ക് മാത്രം ഖജനാവില് നിന്ന് 11 ലക്ഷത്തിലധികം രൂപ ചിലവായതിന്റെ വിവരാവകാശ രേഖകള് (RTI) പുറത്തുവന്നിട്ടുണ്ടല്ലോ!
ജനങ്ങളുടെ നികുതിപ്പണം ഇത്തരത്തില് ധൂര്ത്തടിച്ചിട്ട് ‘നഷ്ടം സ്പോണ്സര്മാര്ക്ക് മാത്രമാണ്’ എന്ന് പറയുന്നത് ഏത് മാന്യതയുടെ അടയാളമാണ്? എവിടെ ആ ‘രഹസ്യ’ കരാറുകള്?
സ്പോണ്സര്മാര് ഒപ്പിട്ടു എന്ന് പറയുന്ന ആ കരാര് രേഖകളും, അര്ജന്റീന ടീമുമായി നടത്തിയ പണമിടപാടുകളുടെ രേഖകളും പുറത്തുവിടാന് അങ്ങ് മടിക്കുന്നത് എന്തുകൊണ്ടാണ്? ഇടപാടുകള് സുതാര്യമാണെങ്കില് അത് വെബ്സൈറ്റില് പ്രസിദ്ധീകരിക്കാന് അങ്ങേയ്ക്ക് എന്തിനാണ് ഭയം?
സ്പോണ്സര്മാര് ആരാണെങ്കിലും അവര് എത്ര പണം, ഏത് വഴി കൈമാറി എന്നും ജനങ്ങളെ അറിയിക്കാത്തത് ഇതില് വന് അഴിമതി ഉള്ളതുകൊണ്ടല്ലേ? ഔദ്യോഗിക രേഖകള് പുറത്തുവിടാതെ ‘ചതി’ ആരോപണം ഉയര്ത്തുന്നത് സ്വന്തം പരാജയം മറച്ചുപിടിക്കാനുള്ള നാടകം മാത്രമാണ്.
അങ്ങയുടെ ‘തള്ളലുകളുടെ’ അഞ്ച് വര്ഷം ഒന്ന് തിരിഞ്ഞു നോക്കിയാല് ഇനിയുമുണ്ട് വിചിത്രമായ വാഗ്ദാനങ്ങള്. 5,000 കോടിയുടെ നിക്ഷേപം വരുമെന്ന് പറഞ്ഞ് നടത്തിയ ആ സ്പോര്ട്സ് സമ്മിറ്റ് മാമാങ്കം എവിടെപ്പോയി? ക്യൂബന് താരങ്ങളെ കൊണ്ടുവരുമെന്ന് പറഞ്ഞ് വിദേശയാത്ര നടത്തി കുറച്ച് ഫോട്ടോ എടുത്തതല്ലാതെ ഒരു പരിശീലകനെങ്കിലും ഇവിടെ വന്നോ?
മെസ്സിയെ കൊണ്ടുവരാന് 250 കോടി ഉണ്ടെന്ന് വീരവാദം മുഴക്കുമ്പോഴും, സെക്രട്ടേറിയറ്റിന് മുന്നില് പട്ടിണി സമരം കിടക്കേണ്ടി വന്ന നമ്മുടെ നാട്ടിലെ കായിക താരങ്ങളുടെ കണ്ണീര് അങ്ങ് കണ്ടില്ല. സ്വന്തം നാട്ടിലെ താരങ്ങളെ പട്ടിണിക്കിട്ട് ജനങ്ങളെ വെല്ലുവിളിക്കുന്നത് ശരിയാണോ പാവങ്ങള് കളി കാണേണ്ട കളിക്കേണ്ട എന്നാണോ.
സ്പോര്ട്സ് കേരള ഫൗണ്ടേഷന് വഴി നടന്ന നിര്മ്മാണ പ്രവര്ത്തനങ്ങളിലെ അഴിമതി ആരോപണങ്ങള് അങ്ങയുടെ ശ്രദ്ധയില് പെടാത്തത് എന്തുകൊണ്ട് ഇറങ്ങിപ്പോകുന്ന ഈ സമയത്തെങ്കിലും മെസ്സിയെയും അര്ജന്റീനയെയും വെറുതെ വിടുക. കേരളത്തിലെ ജനങ്ങള് അങ്ങ് കരുതുന്നത് പോലെ വിഡ്ഢികളല്ല.
അഴിമതിയും പരാജയങ്ങളും മറച്ചുപിടിക്കാന് ഇനിയും മെസ്സിയുടെ പേര് ഉപയോഗിക്കുന്നത് മാന്യതയല്ല. പറഞ്ഞ നുണകള്ക്കും കാട്ടിയ സ്വപ്നങ്ങള്ക്കും ഖജനാവിലെ പണം മുക്കിക്കൊണ്ട് നടത്തിയ യാത്രകള്ക്കും കണക്ക് മറുപടി പറഞ്ഞില്ല എങ്കിലും വീണ്ടും കള്ളം പറയാതെ എങ്കിലും ഇരുന്നുകൂടെ ഇലക്ഷന് സമയത്ത് ഒന്നും പറയേണ്ട എന്ന് വിചാരിക്കുമ്പോള് പോലും വീണ്ടും വിഡ്ഢികളാക്കാന് നോക്കരുത്.
sportsminister #vabdurahiman #messi #news
About The Author
