കാഞ്ഞങ്ങാട്: സംസ്ഥാനത്ത് ലൈസൻസ് ആവശ്യമില്ലാത്ത ലോ-സ്പീഡ് ഇലക്ട്രിക് സ്കൂട്ടറുകൾ പ്രായപൂർത്തിയാകാത്ത കുട്ടികൾ ദുരുപയോഗം ചെയ്യുന്ന സാഹചര്യത്തിൽ അടിയന്തര ഇടപെടൽ ആവശ്യപ്പെട്ട് ചൈൽഡ് പ്രൊട്ടക്റ്റ് ടീം സംഘടനയ്ക്ക് വേണ്ടി ചെയർമാൻ സികെ നാസർ കാഞ്ഞങ്ങാട് മുഖ്യമന്ത്രിക്ക് സമർപ്പിച്ച പരാതിയിൽ നടപടി ആരംഭിച്ചു.
മുഖ്യമന്ത്രിയുടെ ഓഫീസിൽ നിന്ന് ലഭിച്ച ഔദ്യോഗിക മറുപടിയിൽ, വിഷയത്തിൽ “ഉചിതമായ നടപടി സ്വീകരിക്കുന്നതിനായി ട്രാൻസ്പോർട്ട് കമ്മീഷണർക്ക് കൈമാറിയിരിക്കുന്നു” എന്ന് അറിയിച്ചിട്ടുണ്ട്. ഇത് വിഷയത്തിന്റെ ഗൗരവം സർക്കാർ തലത്തിൽ പരിഗണിക്കപ്പെടുന്നുവെന്നതിന്റെ തെളിവാണെന്ന് സംഘടന അറിയിച്ചു.
സംസ്ഥാനത്തിന്റെ വിവിധ ഭാഗങ്ങളിൽ, പ്രത്യേകിച്ച് സ്കൂൾ പരിസരങ്ങളിലും നഗര പ്രദേശങ്ങളിലെ തിരക്കേറിയ റോഡുകളിലും, പ്രായപൂർത്തിയാകാത്ത കുട്ടികൾ ഹെൽമെറ്റ് ഇല്ലാതെ, രണ്ട് പേരിലധികം കയറി, മറ്റ് വാഹനങ്ങൾക്കിടയിൽ അപകടകരമായി ഇലക്ട്രിക് സ്കൂട്ടറുകൾ ഓടിക്കുന്ന സാഹചര്യം വർധിച്ചുവരുന്നതായി പരാതിയിൽ ചൂണ്ടിക്കാട്ടിയിരുന്നു. പലപ്പോഴും റോഡ് സുരക്ഷാ ചട്ടങ്ങൾ ലംഘിക്കപ്പെടുന്നുവെന്നും ഇത് കുട്ടികളുടെ ജീവനും പൊതുജനങ്ങളുടെ സുരക്ഷയ്ക്കും ഗുരുതരമായ ഭീഷണിയാണെന്നും സംഘടന വ്യക്തമാക്കി.
Motor Vehicles Act പ്രകാരം 25 കിലോമീറ്റർ വേഗപരിധിയും 250 വാട്ട് ശേഷിയുമുള്ള ചില ഇലക്ട്രിക് വാഹനങ്ങൾക്ക് ഡ്രൈവിംഗ് ലൈസൻസ് നിർബന്ധമല്ല. എന്നാൽ ഹെൽമെറ്റ് ധരിക്കൽ, ഇരട്ടയാത്ര മാത്രമേ അനുവദനീയമാകൂ, പ്രായപരിധി സംബന്ധിച്ച വ്യവസ്ഥകൾ, പൊതുസുരക്ഷാ മാനദണ്ഡങ്ങൾ എന്നിവ നിർബന്ധമായും പാലിക്കേണ്ടതാണ്. നിയമലംഘനങ്ങൾ സംഭവിച്ചാൽ മാതാപിതാക്കൾക്കും ഉത്തരവാദിത്വം ബാധകമാകുന്നതാണ്.
ചൈൽഡ് പ്രൊട്ടക്റ്റ് ടീം ചെയർമാൻ സികെ നാസർ പ്രസ്താവനയിൽ പറഞ്ഞു:
“കുട്ടികളുടെ ജീവൻ അപകടത്തിലാകുന്ന സാഹചര്യം തടയാൻ സർക്കാർ ഇടപെട്ടത് സ്വാഗതാർഹമാണ്. ട്രാൻസ്പോർട്ട് വകുപ്പും പൊലീസ് വിഭാഗവും ചേർന്ന് സംസ്ഥാനതലത്തിൽ പ്രത്യേക പരിശോധനയും ബോധവൽക്കരണവും ആരംഭിക്കണം. മാതാപിതാക്കൾക്കും വലിയ ഉത്തരവാദിത്വമുണ്ട്.”
സംഘടന മുഖ്യമന്ത്രിക്ക് സമർപ്പിച്ച പരാതിയിൽ ആവശ്യപ്പെട്ട പ്രധാന കാര്യങ്ങൾ:
സ്കൂൾ പരിസരങ്ങളിൽ പ്രത്യേക എൻഫോഴ്സ്മെന്റ് ഡ്രൈവ് നടത്തുക
ഹെൽമെറ്റ് നിയമം കർശനമായി നടപ്പാക്കുക
പ്രായപൂർത്തിയാകാത്ത കുട്ടികൾ വാഹനമോടിക്കുന്നത് തടയാൻ വ്യക്തമായ സർക്കുലർ പുറത്തിറക്കുക
മാതാപിതാക്കൾക്കായുള്ള ബോധവൽക്കരണ ക്യാമ്പയിൻ ആരംഭിക്കുക
ലോ-സ്പീഡ് ഇലക്ട്രിക് വാഹനങ്ങൾ സംബന്ധിച്ച സംസ്ഥാനതല സുരക്ഷാ മാർഗ്ഗനിർദ്ദേശം പുറത്തിറക്കുക
സംസ്ഥാനതലത്തിൽ ശക്തമായ നടപടികൾ ഉണ്ടാകുമെന്ന് പ്രതീക്ഷിക്കുന്നതായി ചൈൽഡ് പ്രൊട്ടക്റ്റ് ടീം അറിയിച്ചു. ആവശ്യമെങ്കിൽ തുടർ നിയമപരമായ നടപടികളും സ്വീകരിക്കുമെന്ന് സംഘടന വ്യക്തമാക്കി.
About The Author
